មកដឹងអំពីអង្ករផ្ការំដួល របស់កម្ពុជាដែលទទួលបានជ័យលាភី ជាអង្ករល្អបំផុតលំដាប់ពិភពលោកជាលើកទី៥
បាន ច័ន្ទតារារិទ្ធ
25 November, 2022
434
អង្ករ «ផ្ការំដួល»របស់កម្ពុជាបានទទួលជ័យលាភីជាអង្ករល្អបំផុតលំដាប់ពិភពលោកជាថ្មីម្តងទៀត បន្ទាប់ពីលេខ១ រយៈពេលបីឆ្នាំជាប់ៗគ្នាគឺនៅឆ្នាំ ២០១២ ឆ្នាំ២០១៣ និងឆ្នាំ២០១៤ និងចុងក្រោយក្នុងឆ្នាំ ២០១៨ ហើយនៅឆ្នាំនេះក្នុងវេទិកាស្រូវអង្ករពិភពលោកដែលរៀបចំធ្វើនៅទីក្រុងភូកេត ប្រទេសថៃ ខណៈនេះជាលើកទី ៥ ហើយដែលអង្ករកម្ពុជាឈ្នះពានរង្វាន់នេះដោយអាជ្ញា កណ្តាលកាត់សេចក្តីអន្តរជាតិ។
មានមូលហេតុមួយនៅក្នុងនោះ ដែលធ្វើឲ្យអង្ករផ្ការំដួលរបស់កម្ពុជាទទួលបានជ័យលាភីជាថ្មីម្តងទៀតគឺ ៖ ក្លិនក្រអូបធម្មជាតិនៃអង្កររំដួលកម្ពុជា ព្រមទាំងសាច់អង្ករល្អគួរឲ្យចង់ទទួល ទានធ្វើឲ្យអតិថិជនជាច្រើនមានការកោតសរសើរទូទាំងពិភពលោក ។ ដោយសារកសិករកម្ពុជាប្រើប្រាស់ជីតិចបំផុតសម្រាប់ការដាំដុះបើធៀបទៅនឹងបណ្តាប្រទេសផ្សេងទៀតទើបធ្វើ ឲ្យអង្ករផ្ការំដួលកម្ពុជា ផ្តល់នូវអត្ថប្រយោជន៍ដល់សុខភាព យ៉ាងល្អសម្រាប់អតិថិជនបើធៀបទៅនឹងប្រភេទអង្ករដទៃទៀត។
អង្កររបស់កម្ពុជាពូជ «ផ្ការំដួល»ត្រូវបានជាប់ជា«អង្ករល្អដាច់គេ»ក្នុងវេទិកាស្រូវអង្ករពិភពលោកដែលរៀបចំធ្វើនៅទីក្រុងភូកេត ប្រទេសថៃ ខណៈនេះជាលើកទី ៥ ហើយដែលអង្ករកម្ពុ ជាឈ្នះពានរង្វាន់នេះ។
លោក សុង សារ៉ន ប្រធានសហព័ន្ធស្រូវអង្ករកម្ពុជា (CRF)បានប្រាប់ថ្លែងនៅថ្ងៃទី ១៧ ខែវិច្ឆិកាថា ការឈ្នះពានរង្វាន់អង្ករល្អដាច់គេ នេះគឺជាកិត្តិយស ដ៏ធំសម្រាប់វិស័យស្រូវអង្ករកម្ពុជា។ នេះជាលើកទី ៥ ហើយដែលអង្ករកម្ពុជាបានទទួលជ័យលាភី។ កម្ពុជាឈ្នះអង្ករល្អដាច់គេប្រចាំឆ្នាំ ២០២២ នៅវេទិកាស្រូវ-អង្ករពិភពលោកនៅភូកេតប្រទេសថៃ នាថ្ងៃទី១៧ ខែវិច្ឆិកា ឆ្នាំ ២០២២ ។ លោកបានអរគុណដល់ក្រុមការងារសហព័ន្ធស្រូវអង្ករកម្ពុជា កសិករ សមាជិករោងម៉ាស៊ីនកិនស្រូវ សហគមន៍កសិកម្ម ក្រសួងកសិកម្ម និងក្រសួងពាណិជ្ជកម្ម ដែលផ្តល់ការគាំទ្រផលិតអង្ករល្អដាច់គេ ដើម្បីចូលរួមប្រកួត និងនាំពានរង្វាន់មកកម្ពុជា។
លោក ឡាយ ឈុនហួ អគ្គនាយកក្រុមហ៊ុន City Rice Import Export ដែលបាននាំយក «អង្កររំដួល»កម្ពុជាទៅចូលរួមប្រកួតក្នុងវេទិកាខាងលើ និងទទួលបានពានរង្វាន់លេខ១ជា «អង្ករល្អដាច់គេ» បានឲ្យដឹងថា លទ្ធផលនេះនឹងផ្តល់ផលវិជ្ជមានច្រើនសម្រាប់វិស័យស្រូវអង្ករកម្ពុជា ពិសេស វានឹងជួយឱ្យការនាំចេញមានបរិមាណកាន់តែច្រើន ។ នេះជាមោទកភាពយ៉ាងខ្លាំងចំពោះវិស័យស្រូវអង្ករកម្ពុជា។ កិត្តិនាមដែលទទួលបាននេះ នឹងជួយផ្សព្វផ្សាយពីគុណភាពអង្ករកម្ពុជាកាន់តែច្រើនពិសេសធ្វើឱ្យគេស្គាល់ពីគុណភាពអង្ករកម្ពុជា។
លោក ឡាយ ឈុនហួ បានឲ្យដឹងថា៖ដើម្បីទទួលបានជ័យលាភីនេះអង្ករកម្ពុជាត្រូវឆ្លងកាត់ការត្រួតពិនិត្យទៅលើចំណុចជាច្រើនដូចជារូបរាងគ្រាប់អង្ករ, ភាពទន់, ក្លិន និងរសជាតិជា ដើម។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រម៉ាញ់ និង នេសាទ ក៏បានសរសេរនៅលើ បណ្តាញសង្គមផ្ទាល់ខ្លួនថា៖ «សូមអបអរសាទរយ៉ាងក្លៀវក្លាចំពោះអង្ករកម្ពុជាពូជ «ផ្ការំដួល» ដែលទទួលជ័យលាភីលេខ ១ សម្រាប់ឆ្នាំ ២០២២ ជា «អង្ករល្អដាច់គេ»លំដាប់ថ្នាក់ពិភពលោកក្នុងការប្រកួតប្រជែងនៃវេទិកាស្រូវ-អង្ករពិភពលោក នៅខេត្តភូកេត ប្រទេសថៃ នាថ្ងៃទី ១៧ ខែវិច្ឆិកា ឆ្នាំ ២០២២។ នេះជាលើកទី ៥ ហើយដែលអង្ករកម្ពុជាទទួលជ័យលាភីនេះនិងនាំមកនូវមោទកភាពសម្រាប់កម្ពុជា»។
ពូជស្រូវ"ផ្ការំដួល"ជាពូជស្រូវកណ្តាលក្រអូបដែលបានធ្វើការបញ្ចេញ និងផ្សព្វផ្សាយជូនកសិករប្រើប្រាស់ដោយ វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា នៃក្រសួងកសិកម្ម រុក្ខាប្រ មាញ់ និងនេសាទ នាឆ្នាំ ១៩៩៩ ។ បច្ចុប្បន្ន ពូជស្រូវផ្ការំដួលបាន នឹងកំពុងពេញនិយមក្នុងចំណោមប្រជាកសិករ នៅក្នុងព្រះរាជាណាចក្រកម្ពុជា ដោយពូជស្រូវ នេះផ្តល់នូវទិន្នផលខ្ពស់ គុណភាពអង្ករល្អប្រសើរ មានភាពថ្លា វែងរលូន បាយទន់ឆ្ងាញ់ ថែមទាំងមានក្លិនក្រអូបទៀតផង។ ជាពិសេសទៅទៀតជាពូជ ដែលមានប្រភេទអង្ករមានតម្លៃខ្ពស់នៅលើទីផ្សារជាតិ និងអន្តរជាតិ។
អង្ករផ្ការំដួល របស់កម្ពុជាចាប់ផ្តើមល្បីល្បាញក្នុងមជ្ឈដ្ឋានជាតិ និងអន្តរជាតិ នៅក្នុងសិក្ខាសាលាស្តីពីអង្ករពិភពលោកសម្រាប់ពាណិជ្ជកម្ម អង្ករឆ្នាំ ២០១២ នៅកោះបាលី ប្រទេសឥណ្ឌូ នេស៊ី ។សិក្ខាសាលាដែលដំណើរការចាប់ពីថ្ងៃទី ២៦ដល់ថ្ងៃទី២៨ ខែកញ្ញាចូលរួមដោយប្រទេសនាំអង្ករចេញសំខាន់ៗជាង ៤០ ដែលក្នុងនោះមានប្រទេសមកពីទ្វីបអាស៊ី អឺរ៉ុប និងអាហ្វ្រិក ។ ពេលនោះក៏មានការប្រកួតប្រជែងអង្ករផងដែរ ពេលនោះហើយដែលអង្ករផ្ការំដួលរបស់កម្ពុជាត្រូវបានវាយតម្លៃដោយអាជ្ញាកណ្តាលអន្តរជាតិថា ជាអង្ករល្អបំផុតលើពិភពលោក ។ ការទទួលពានរង្វាន់នេះ បានជួយបង្កើនការបញ្ជាទិញពីអន្តរជាតិ ដែលពីមុនមកគេពុំទាន់យល់ច្បាស់ពីគុណភាពនៃអង្ករខ្មែរ ។ ធ្វើឱ្យអ្នកទិញអន្តរជាតិមានការចាប់អារម្មណ៍ខ្លាំង។ ធ្វើឲ្យ កម្ពុជាអាចជំរុញការនាំចេញអង្ករបានច្រើនស្របតាមគោលនយោបាយរបស់រាជរដ្ឋាភិបាលកម្ពុជាដែលចង់នាំអង្ករចេញឱ្យបាន១លានតោន។ ទី២ អាចណែនាំថាអង្ករកម្ពុជាមានលទ្ធភាពប្រកួតប្រជែង ជាមួយអង្ករមកពីថៃ ឬវៀតណាមដែរ ។ នៅក្នុងប្រកួតពេលនោះចំណាត់ថ្នាក់លេខ២ និងលេខ៣បានទៅអង្ករមកពីប្រទេសថៃ ។
ជាការពិតលក្ខខណ្ឌ នៃការឱ្យពិន្ទុអង្ករមានភាពសម្ងាត់ ប៉ុន្តែក្រុមអ្នកជំនាញបានបង្ហើបឱ្យដឹងថាការវាយតម្លៃត្រូវបានយោងទៅលើលក្ខណៈពិសេសមួយចំនួនរបស់អង្ករដូចជា ភាពសរលោង ទំហំអង្ករកម្រិតនៃភាពបាក់រសជាតិ និងក្លិនជាដើម។ បាយដែលដាំចេញពីអង្ករផ្ការំដួលរបស់កម្ពុជាមានក្លិនក្រអូបប្រហើរនិងទន់ល្អ។ សព្វថ្ងៃនេះកម្ពុជានាំចេញនូវអង្ករ ផ្ការំដួល នាងម្លិះ សូម៉ាលី ផ្កាខ្ញី និង សែនក្រអូបជាដើម ដែលសុទ្ធសឹងជាប្រភេទអង្ករមានក្លិនប្រហើរនិងមានរសជាតិឆ្ងាញ់។
គួររំលឹកនៅឆ្នាំ២០១៦ បានកំណត់ស្តង់ដារកម្ពុជា សម្រាប់អង្ករផ្ការំដួល និងអង្ករ ផ្កាច័ន្ទសែនសរ ដែលរៀបចំដោយវិទ្យាស្ថានស្ដង់ដារកម្ពុជា ក្រោមកម្មវិធីជំរុញផលិតកម្មស្រូវ និងការនាំ ចេញអង្ករ ក្នុងក្របខ័ណ្ឌហិរញ្ញប្បទានរបស់ធនាគារអភិវឌ្ឍន៍អាស៊ី ។ ស្តង់ដារទាំងនេះកំណត់នូវចរឹតលក្ខណៈ គុណភាពរបស់អង្ករទាំងពីរប្រភេទ ដែលជាអត្តសញ្ញាណសម្គាល់អង្ករកម្ពុជា ប្រភេទអង្ករផ្ការំដួលនិងអង្ករផ្កាច័ន្ទសែនសរ ដែលមិនមានប្រទេសណាមួយអាចបន្លំបាននោះឡើយ ហើយវាក៏ជាឯកសារយោងសម្រាប់ភាគីពាក់ព័ន្ធមានដូចជា អ្នកផលិត អ្នកធ្វើអាជីវកម្ម នាំចេញ នាំចូល អ្នកចែកចាយ អ្នកប្រើប្រាស់ និងអ្នកអនុវត្តច្បាប់ យកទៅប្រើប្រាស់ ដើម្បីពង្រឹងគុណភាពផលិតផល និងពង្រីកលទ្ធភាពធ្វើពាណិជ្ជកម្មទាំងនៅក្នុង និងក្រៅប្រទេស។
ជាមួយនេះវិទ្យាស្ថានស្ដង់ដារកម្ពុជា ដែលជាលេខាធិការដ្ឋានរបស់ក្រុមប្រឹក្សាស្តង់ដារជាតិនិងគណៈកម្មការបច្ចេកទេសស្ដង់ដារ បានបន្តខិតខំរៀបចំសេចក្តីព្រាងស្តង់ដារចំនួន៥ប្រភេទផ្សេងទៀតដែលបានចាត់ ជាផលិតផលអាទិភាពក្នុងចំណោមផលិតផលអង្ករទាំង ១០ ប្រភេទដែលបានកំណត់ដោយក្រសួងកសិកម្ម រុក្ខាប្រមាញ់ និងនេសាទ រួមមាន អង្ករ ផ្ការមៀត អង្ករសែនពិដោរ អង្កររាំងជ័យ អង្ករអ៊ីអ៊ែរ៦៦ និង អង្ករជលសារ ដើម្បីចូលរួមជាមួយរដ្ឋាភិបាលក្នុងការការពារសុវត្ថិភាពអ្នកប្រើប្រាស់ធានាសុខុមាលភាពសាធារណៈ បរិស្ថាន និងគាំទ្រដល់ការជំរុញ ការនាំចេញអង្ករទៅលើទីផ្សារតំបន់ និងអន្តរជាតិ ។
លក្ខណៈពិសេសៗរបស់ពូជស្រូវផ្ការំដួល
ពូជស្រូវផ្ការំដួល ជាពូជស្រូវដែលប្រកាន់រដូវមធ្យម ចាប់ចេញផ្កាពីពាក់កណ្តាលខែតុលា អាស្រ័យទៅលើអាកាសធាតុ និងពេលវេលាដាំដុះ ។ កម្ពស់ដើមរបស់ពូជផ្ការំដួល ប្រែប្រួលពី១១០- ១៧០ សង់ទីម៉ែត្រ និងចំនួនដើមបែក ផ្តល់ផលគឺចាប់ពី ៥-១០ ដើមក្នុងមួយគុម្ព អាស្រ័យទៅតាមប្រភេទដី ។ ប្រភេទគ្រាប់ក្នុងមួយកួរមានចាប់ពី ១១០-១៥០ គ្រាប់ និងមានប្រវែងកួរ ១៨-២៨ សង់ទីម៉ែត្រ ។ ពូជផ្ការំដួល ធន់ទៅនឹងទឹកជំនន់បានល្អ ប៉ុន្តែមិនសូវធន់ទៅនឹងមមាត្នោតទេ និងមានទិន្នផលជាមធ្យម ៣,៥ តោន ក្នុង ១ ហិកតា នឹងអាចខ្ពស់ដល់ទៅ ៥,៥ តោនក្នុង១ ហិកតា។
វិធីសាស្ត្រដាំដុះ
សម្រាប់ស្រូវសន្ទូង បរិមាណគ្រាប់ពូជដែលចាំបាច់គឺពី ៣០-៤០ គីឡូក្រាម ក្នុងមួយហិកតា ប៉ុន្តែក្នុងករណីដែលគ្រាប់ពូជសុទ្ធ និង មានសុខភាពល្អ ព្រមទាំងគ្រប់គ្រងទឹកបាន និងថែទាំបានល្អ បរិមាណគ្រាប់ពូជដែលត្រូវការក្នុងមួយហិរតា គឺពី ១៥-២០ គីឡូក្រាមប៉ុណ្ណោះ ។ដើម្បីឲ្យសំណាបដុះលូតលាស់ធំធាត់ល្អ គេត្រូវសាបគ្រាប់ពូជ មួយគីឡូក្រាមលើផ្ទៃដីថ្នាល ១០ ម៉ែត្រការ៉េ ។ ទីសំណាបត្រូវធ្វើនៅជិតប្រភពទឹក តែត្រូវឆ្ងាយពីម្លប់ព្រៃ ឬ កន្លែងមានភ្លើងអគ្គិសនី ដើម្បីជៀសវាងការបំផ្លាញពីសត្វល្អិតចង្រៃ ។ ជាការល្អគួរស្ទូងសំនាបដែលមានអាយុ ពី២៥-៣០ ថ្ងៃហើយក្នុងមួយគុម្ពចំនួន ២ ទៅ ៣ ដើម ។ សម្រាប់ស្រូវពង្រោះ បរិមាណគ្រាប់ពូជដែលចាំបាច់គឺពី ៦០ គីឡូក្រាមក្នុងមួយហិកតា ។ គួររៀបចំដីឲ្យបានល្អ និងរាបស្មើមុន ព្រោះ ។ ការភ្ជួររាស់ គួរតែធ្វើឲ្យបាន ២ ទៅ ៣ ដង ជាការល្អប្រសើរ ។ប្រសិនបើស្រែអាចបញ្ចេញបញ្ចូលទឹកបានបន្ទាប់ពីស្ទូង ឬព្រោះបាន២០ថ្ងៃអាចបញ្ចេញទឹកឲ្យអស់ពីក្នុងស្រែ ២ទៅ៤ ថ្ងៃរួចបញ្ចូលទឹកថ្មី ។ ធ្វើរបៀបនេះគឺដើម្បីធ្វើឲ្យស្រូវកាន់តែបែកគុម្ពល្អ ។
ការប្រើប្រាស់ជី
ការប្រើប្រាស់ជីសមស្របតាមកម្រិតណែនាំ នឹងមិនបណ្តាលឲ្យមានការថយចុះ ឬបាត់បង់ក្លិន ឬគុណភាពដទៃទៀតឡើយ។ គួរដាក់ជី ២-៣ ដង ក្នុងមួយវដ្តជីវិតរបស់ស្រូវ។ បាចទ្រាប់ បាតមុនពេលស្ទូង ដោយប្រើជីធម្មជាតិពី ៥ តោន ក្នុង១ហិកតា និងរួមផ្សំ ជាមួយជីគីមីដូចមានដូចបានកំណត់ ។
ការប្រមូលផល
ត្រូវប្រមូលផលស្រូវនៅពេលគ្រាប់ទុំល្អ គឺនៅពេលដែលកួរស្រូវមានគ្រាប់ចាប់ពីពាក់កណ្តាលកួរឡើងទៅមានព័ណ៌លឿងទុំចាស់ និង គ្រាប់ពេញពាក់កណ្តាលកួរចុះក្រោមមានព័ណ៌លឿង ទុំស្រាល ហើយគ្រាប់ស្កកវិញមានព័ណ៌ស្លាបសេកចាស់ ។
គែអាចហាលសម្ងួតស្រូវនៅលើកន្ទេល សំណាញ់មុង តង់កៅស៊ូ និង លានស៊ីម៉ង់ត៌ គឺមិន បណ្តាលឲ្យគុណភាពគ្រាប់ស្រូវ ឬ គ្រាប់ស្រូវពូជខុសគ្នាឡើយ ។ កម្រាស់គ្រាប់ស្រូវដែលសមស្រប សម្រាប់ការហាលសម្ងួត គឺ ២ ទៅ ៣ សង់ទីម៉ែត្រ ដែលកម្រាស់គ្រាប់ និងសភាពពន្លឺថ្ងៃគឺជាកត្តាចម្បងក្នុងការកំណត់រយៈពេលហាល និងគុណភាពគ្រាប់ស្រូវ៖ ថ្ងៃស្រឡះល្អ ហាលតែ ១ ថ្ងៃ ប៉ុណ្ណោះ ដោយកន្លះម៉ោង វី ម្តង ។ ថ្ងៃស្រឡះបង្គួរ ហាលសម្ងួតរយៈពេល ២ ថ្ងៃ ដោយមួយម៉ោង វី ម្តង ។ ថ្ងៃមិនស្រឡះ គេត្រូវហាលរហូតដល់ ៣ ថ្ងៃដោយ ២ ម៉ោង វី ម្តង ។
ចំណែកគ្រាប់ពូជត្រូវច្រកទុកក្នុងថង់ប្លាស្ទិកចងឲ្យជិត រួចដាក់ក្នុងបាវមួយជាន់ទៀត ហើយទុកដាច់ដោយឡែកពីគ្រាប់ស្រូវចំណី នៅកន្លែងដែលស្ងួតល្អ និងគ្មានការបំផ្លាញពីសត្វ កណ្តុរ មាន់ ទា ជាដើម ។
សូរនៃពាក្យ"ផ្ការំដួល"ពីបុរាណមក ខ្មែរយើងតែងប្រៀបប្រដូចស្រីក្រមុំទៅនឹងផ្ការំដួលក៏ព្រោះតែផ្ការំដួលមានសម្រស់ស្អាត និង មានក្លិនពិដោរក្រអូបឈ្ងុយឈ្ងប់ គួជាទីទាក់ទាញពីសាធារណៈជនទូទៅ។ ក្រៅពីប្រដូចផ្ការំដួលទៅ នឹងនារីខ្មែរ តាមរយៈក្លិនក្រអូបនោះ ផ្ការំដួល ក៏ត្រូវក្រុមអ្នកកវី និពន្ធខ្មែរលើកយកទៅធ្វើអត្ថាធិប្បាយរៀបរាប់ពីរូបសម្រស់តួអង្គ ដែលល្អ គន់ធៀបនិងសម្រស់ផ្ការំដួលនៅក្នុងអត្ថន័យនៃបទចម្រៀង កំណាព្យ និងប្រលោមលោកផងដែរ។ ក្នុងវិស័យកសិកម្ម ពូជស្រូវផ្ការំដួល គឺជាពូជស្រូវក្រអូប ដែលមានអង្ករ វែងរលូន បាយ ទន់ មានរសជាតិក្រអូបឆ្ងាញ់និងចាត់ទុកជាប្រភេទស្រូវក្រអូបលេខ១សម្រាប់បម្រើការនាំចេញផង ។
របាយការណ៍ក្រសួងកសិកម្មបានឱ្យដឹងថា ក្នុងរយៈពេល ១០ ខែឆ្នាំ ២០២២ កម្ពុជាបាននាំចេញអង្ករ ទៅទីផ្សារ អន្តរជាតិ ចំនួន ៥០៩ ២៤៩ តោន កើនឡើង ៤៩ ០៨០ តោន ស្មើ ១០,៦៧ ភាគរយ បើធៀប រយៈពេលដូចគ្នា ក្នុងឆ្នាំ ២០២១ ដែលមាន ៤៦០ ១៦៩ តោន ក្នុងនោះអង្ករក្រអូបគ្រប់ប្រភេទមានចំនួន ៣៤៨ ៥០១តោនស្មើនឹង ៦៨,៤៤ភាគរយ,អង្ករសគ្រប់ប្រភេទ មានចំនួន ១៤៨ ៩៣៣តោន ស្មើនឹង ២៩,២៤ភាគរយ និង អង្ករចំហុយគ្រប់ប្រភេទមានចំនួន ១១ ៨១៥តោន ស្មើនឹង ២,៣២ភាគរយ ។ សម្រាប់ខែតុលា ឆ្នាំ ២០២២ ការនាំចេញមានចំនួន ៥៩ ៨៨៨ តោន កើន ១០ ៤១៧ តោន ស្មើ ២១,០៦ ភាគរយធៀបនឹងខែតុលា ឆ្នាំ ២០២១។ទឹកប្រាក់បានពីការនាំចេញអង្ករក្នុងរយៈពេល ១០ ខែឆ្នាំ ២០២២ មាន ៤៣៥ ៤០៧ ៨៩៥ ដុល្លារ កើនឡើង ១០,៧៩ ភាគរយពីចំនួន ៣៩២ ៩៨៤ ៣២៦ ដុល្លារកាលពីរយៈពេល ១០ ខែឆ្នាំ ២០២១ ៕
ប្រភពរូបឯកសារ
Related Post
.png){kind=icon}
.png){kind=icon}
