អ្នកផ្គត់ផ្គង់ទីផ្សារថា ផ្លែក្រូចពោធិ៍សាត់ដាំនៅស្រុកភ្នំក្រវាញកំពុងទទួលបានការគាំទ្រខ្លាំង
វណ្ណ កុសល
08 December, 2022
999
ខេត្តពោធិ៍សាត់៖ កសិផលផ្លែក្រូចពោធិ៍សាត់ដែលត្រូវបានដាំដុះនៅក្នុងទឹកដី នៃស្រុកភ្នំក្រវាញ ខេត្តពោធិ៍សាត់ ក្នុងពេលបច្ចុប្បន្ននេះ ត្រូវបានអ្នកផ្គត់ផ្គង់លើទីផ្សារបង្ហាញថា កំពុងទទួលបាននូវការគាំទ្រខ្លាំងពីអតិថិជនទូទៅ ដោយនៅក្នុងថ្ងៃខ្លះការផ្គត់ផ្គង់កសិផលនេះទៅលើទីផ្សារធ្វើមិនបានគ្រប់គ្រាន់តាមតម្រូវការនោះទេ។
លោក យន់ សារិន ប្រធានក្រុមការងារមោលីបន្លែផ្លែឈើត្រីសាច់សហគមន៍ដើម្បីផ្គត់ផ្គង់លើទីផ្សារក្នុងស្រុកបាននិយាយឱ្យដឹងកាលពីថ្ងៃទី២៧ ខែតុលា ឆ្នាំ២០២២ ថា នៅក្នុងរយៈពេលមួយឆ្នាំចុងក្រោយនេះ កសិផលផ្លែក្រូចពោធិ៍សាត់ដែលប្រជាកសិករបានដាំដុះនៅក្នុងទឹកដីនៃស្រុកភ្នំក្រវាញ បានទទួលការគាំទ្រខ្លាំងពីអតិថិជនទូទៅគួរឱ្យកត់សម្គាល់។ លោកថា បើទោះបីមិនមានកេរ្តិ៍ឈ្មោះល្បីល្បាញដូចជា ក្រូចពោធិ៍សាត់ដែលត្រូវបានដាំដុះនៅតំបន់ភ្នំបាណន់ និងអូរខ្ជាយ នៃទឹកដីខេត្តបាត់ដំបងក៏ដោយ ក៏ក្រូចពោធិ៍សាត់ដែលបានដាំនៅតំបន់ភ្នំក្រវាញមានគុណភាពល្អ និងរសជាតិឆ្ងាញ់ធ្វើឱ្យអ្នកដែលបានបរិភោគជាច្រើនពេញចិត្ដដែរ។
ប្រធានក្រុមការងារមោលី និងជាម្ចាស់ចម្ការក្រូចពោធិ៍សាត់នៅក្នុងទឹកដីភូមិកំពង់ក្ទម្ព ឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់ផងដែររូបនេះក៏បានឱ្យដឹងទៀតថា បច្ចុប្បន្ន កសិផលផ្លែក្រូចពោធិ៍សាត់ភ្នំក្រវាញត្រូវបានលក់ចែកចាយនៅលើទីផ្សារទូទាំងប្រទេស ក្នុងនេះទីផ្សារសំខាន់ៗមានដូចជា នៅរាជធានីភ្នំពេញ ខេត្តសៀមរាប និងខេត្តព្រះសីហនុជាដើម។លោក យន់ សារិន ប្រាប់ថា៖ សព្វថ្ងៃនេះផ្លែក្រូចពោធិ៍សាត់ភ្នំក្រវាញ ក្រៅពីបាននាំយកទៅលក់នៅលើទីផ្សារទូទៅនោះ យើងក៏មាននាំយកទៅដាក់លក់នៅតាមផ្សារទំនើបនានា ពិសេសក៏មានភោជនីយដ្ឋានយីហោល្បីៗមួយចំនួនដូចជា ភោជនីយដ្ឋានផាកកាហ្វេ ជាដើម បានបញ្ជាទិញជាប្រចាំឆ្នាំដើម្បីយកទៅច្នៃធ្វើជាភេសជ្ជៈលក់ជូនអតិថិជនរបស់ខ្លួនផងដែរ។
លោក យន់ សារិន បង្ហាញថា លក្ខណៈពិសេសនៃកសិផលផ្លែក្រូចពោធិ៍សាត់ដែលបានដាំដុះនៅតំបន់ភ្នំក្រវាញ គឺមានរសជាតិជូអែមឆ្ងាញ់ ហើយលើសពីនេះគឺក្រូចពោធិ៍សាត់ប្រចាំតំបន់ភ្នំក្រវាញត្រូវបានប្រជាកសិករដាំដុះឡើងដោយប្រើជីធម្មជាតិ ពោលគឺមិនមានការប្រើប្រាស់ថ្នាំ និងសារធាតុគីមីនោះទេ។បើប្រៀបធៀបជាមួយក្រូចពោធិ៍សាត់ដែលដាំនៅក្នុងខេត្តបាត់ដំបងនោះ លោក យន់ សារិន លើកឡើងថា សព្វថ្ងៃនេះ ទិន្នផលផ្លែក្រូចពោធិ៍សាត់ដែលបានដាំដុះនៅស្រុកភ្នំក្រវាញបានផ្ដល់ផលមានបរិមាណច្រើនអាចឱ្យផ្គត់ផ្គង់នៅលើទីផ្សារទូទាំងប្រទេសបានទូលំទូលាយ និងអាចឱ្យធ្វើការផ្គត់ផ្គង់នៅលើទីផ្សារបានក្នុងរយៈពេលយូរខែជាង ហើយដោយសារតែមានតម្លៃទាបជាងផ្លែក្រូចពោធិ៍សាត់បាត់ដំបងផងដែរនោះ បានធ្វើឱ្យកសិផលផ្លែក្រូចពោធិ៍សាត់ភ្នំក្រវាញត្រូវបានលក់ចេញក្នុងមួយឆ្នាំៗអស់រាប់សិបតោនឯណោះ។
បើតាមមន្ត្រីនៃមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់បានបង្ហាញថា ស្រុកភ្នំក្រវាញគឺជាស្រុកមួយរបស់ទឹកដីនៃខេត្តពោធិ៍សាត់ ដែលមានផ្ទៃដីដាំដុះនូវដំណាំក្រូចពោធិ៍សាត់ច្រើនជាងគេ។ស្រុកភ្នំក្រវាញ គឺជាស្រុកមួយរដែលមានសក្ដានុពលខ្លាំង និងអំណោយផលល្អលើការដាំដុះដំណាំកសិកម្ម ពិសេសគឺដំណាំក្រូចពោធិ៍សាត់តែម្ដង។ ប្រភពដដែលបានបង្ហាញទៀតថា នៅក្នុងរយៈពេលប៉ុន្មានឆ្នាំចុងក្រោយនេះ ដំណាំក្រូចពោធិ៍សាត់ក៏ត្រូវបានកសិកររស់នៅក្នុងស្រុកវាលវែងរបស់ខេត្តពោធិ៍សាត់ នាំគ្នាដាំដុះជាបន្តបន្ទាប់ផងដែរ។
ស្របពេលដែលប្រជាពលរដ្ឋខ្មែរសព្វថ្ងៃបាននាំគ្នាងាកមកគាំទ្រកសិផលក្នុងស្រុកយ៉ាងផុលផុសនោះ លោក យន់ សារិន បង្ហើបថា៖ ការផ្គត់ផ្គង់ផ្លែក្រូចពោធិ៍សាត់ភ្នំក្រវាញនៅលើទីផ្សារក្នុងស្រុកនៅឆ្នាំនេះ មិនអាចបំពេញបានតាមតម្រូវការនោះទេ ដោយថ្ងៃខ្លះយើងគ្មានផ្លែក្រូចលក់ឱ្យអតិថិជនតបបានតាមការបញ្ជាទិញឡើយ។ លោកប្រាប់ថា បញ្ហានេះដោយសារតែតម្រូវការទីផ្សារមានសន្ទុះកំណើនឡើងខ្លាំង ខណៈដែលបរិមាណផ្លែក្រូចពោធិ៍សាត់តំបន់ភ្នំក្រវាញនៅក្នុងឆ្នាំនេះផ្ដល់ផលមានការធ្លាក់ចុះបណ្ដាលមកពីកត្តាមួយចំនួន។
បើតាមការសិក្សាស្រាវជ្រាវរបស់នាយកដ្ឋានផ្សព្វផ្សាយកសិកម្ម នៃអគ្គនាយកដ្ឋានកសិកម្ម របស់ក្រសួងកសិកម្ម រុក្ខាប្រមាញ់ និងនេសាទ បានឱ្យថា ក្រូចពោធិ៍សាត់ គឺជាដំណាំកសិកម្មមួយប្រភេទដែលទាមទារដាំដុះនៅលើដីតំបន់ទួល តាមដងទន្លេ និងតំបន់ខ្ពង់រាប មានដូចជា នៅខេត្តបាត់ដំបង និងខេត្តពោធិ៍សាត់ជាដើម ហើយតំបន់ដែលអាចដាំក្រូចពោធិ៍សាត់ដើម្បីឱ្យផលបានល្អ ត្រូវតែជាតំបន់ដែលមានលក្ខណៈអាកាសធាតុសមស្រប មានភ្លៀងធ្លាក់ច្រើន តែស្ថានភាពដីមិនដក់ទឹក ដីស្រទាប់ទីមួយធូរ ជ្រៅ ស្រោះទឹកល្អ ហើយដីត្រូវតែមានជីជាតិគ្រប់គ្រាន់ ។
ប្រភពដដែលបានបង្ហាញថា ការដាំដំណាំក្រូចពោធិ៍សាត់នៅកម្ពុជាយើងត្រូវបានកសិករធ្វើឡើងតាមវិធីសាស្ត្រ និងបច្ចេកទេសចំនួន៣មាន ទី១៖ការបណ្ដុះកូនដោយគ្រាប់ពូជ ដែលវិធីនេះត្រូវប្រើពេលយូរចាប់ពី៤ទៅ៦ឆ្នាំទើបអ្នកដាំអាចប្រមូលផលបាន។ ទី២៖ការបំបៅមែក ដែលវិធីនេះត្រូវបានកសិករនិយមប្រើព្រោះមានភាពងាយស្រួល និងចំណាយទុនតិច ហើយបើទោះវាមានអាយុខ្លីឆាប់ងាប់ តែវានឹងឆាប់បានផ្ដល់ផលត្រឹមតែ២ទៅ៣ឆ្នាំប៉ុណ្ណោះក្រោយពេលដាំ និងទី៣៖ការបិទពន្លក និងការផ្សាំមែក ដែលវិធីនេះកសិករនិយមអនុវត្តសម្រាប់ការដាំនៅលើដីចម្ការដែលមានទំហំធំ ពោលគឺបើទោះមានការចំណាយទុនច្រើន តែដើមក្រូចដែលដាំបានតាមវិធីនេះវានឹងអាចរស់បាននៅក្នុងអាយុកាលចាប់ពី១៥ ទៅ២០ឆ្នាំ ហើយក្រោយពេលដាំបានត្រឹមតែ៣ទៅ៤ឆ្នាំប៉ុណ្ណោះវានឹងផ្ដល់ផលបានផងដែរ៕
Related Post
.png){kind=icon}
.png){kind=icon}
