បង្ហាញលទ្ធផលការអង្កេតវាស់វែងជំនាញបណ្តុះបណ្តាលបច្ចេកទេស និងវិជ្ជាជីវៈពីកម្រិត១ដល់កម្រិត៤ នៃក្របខណ្ឌគុណវុឌ្ឍិជាតិកម្ពុជា
វ៉ាយ វត្តី
29 November, 2022
496
លទ្ធផលនៃការធ្វើអង្កេតវាស់វែងជំនាញបណ្តុះបណ្តាលបច្ចេកទេស និងវិជ្ជាជីវៈ ពីកម្រិត១ដល់កម្រិត៤ នៃក្របខណ្ឌគុណវុឌ្ឍិជាតិកម្ពុជា ត្រូវបានផ្សព្វផ្សាយនៅក្នុងសិក្ខាសាលាថ្នាក់ជាតិមួយកាលពីថ្ងៃទី ៤ ខែ សីហា ឆ្នាំ២០២២ នៅសណ្ឋាគារសាន់វេ ភ្នំពេញ ដែលបានរៀបចំឡើងដោយអង្គភាពសម្របសម្រួលគម្រោងនៃកម្មវិធីអភិវឌ្ឍន៍វិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVETSDP) ក្រោយពីបានសិក្សាស្រាវជ្រាវអស់រយៈពេលបីឆ្នាំចាប់ពីឆ្នាំ២០១៥-២០១៧អនុវត្តដោយក្រុមហ៊ុន Young Development Research & Consulting Co., Ltd និង IDRG Companyសហការរួមគ្នាស្រាវជ្រាវ។
ឯកឧត្តម ថង សាម៉ុន ទីប្រឹក្សាអមក្រសួង អគ្គនាយករងអប់រំបណ្តុះបណ្តាលបច្ចេកទេស និងវិជ្ជាជីវៈ និងជាប្រធានសម្របសម្រួលគម្រោងTVETSDP បានបង្ហាញឲ្យដឹងថា តាមរយៈ កម្មវិធីអភិវឌ្ឍវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ TVETSDP ដែលបានគាំទ្រដោយធនាគារអភិវឌ្ឍន៍អាស៊ី(ADB) និងទីភ្នាក់ងារបារាំងសម្រាប់ការអភិវឌ្ឍន៍(AFD) អង្គភាពសម្របសម្រួលបានរៀបចំធ្វើការវាស់វែងជំនាញបណ្តុះបណ្តាលបច្ចេកទេស និងវិជ្ជាជីវៈ ពីកម្រិត១ដល់កម្រិត៤ នៃក្របខណ្ឌគុណវុឌ្ឍិជាតិកម្ពុជា លើវិស័យអាទិភាពចំនួន៤ រួមមាន៖ វិស័យមេកានិករថយន្ត វិស័យសំណង់ វិស័យ អគ្គិសនី និងវិស័យកម្មន្តសាល ក្នុងគោលបំណងដើម្បីសិក្សាឲ្យដឹងច្បាស់ពីស្ថានភាពការងារ រួមទាំងផលិតភាពការងាររបស់សិស្ស ដែលបានបញ្ចប់ការសិក្សា និងប្រតិសកម្ម(Feedback) ពីនិយោជក ដើម្បីជាមូលដ្ឋានយកទៅរៀបចំផែនការ អភិវិឌ្ឍ ការបណ្តុះបណ្តាលធនធានមនុស្សឲ្យកាន់តែមានប្រសិទ្ធភាព និងឆ្លើយតបទៅនឹងតម្រូវការទីផ្សារការងារនាពេលបច្ចុប្បន្ន និងពេលអនាគត ទាំងក្នុងស្រុក និងក្នុងតំបន់។
ឯកឧត្តមប្រធានគម្រោងបានឲ្យដឹងបន្ថែមថា ៖ ការរៀបចំការធ្វើអង្កេតការវាស់វែងនេះ គឺជាការសិក្សាស្រាវជ្រាវឯករាជ្យមួយ ត្រូវបានអនុវត្តដោយក្រុមហ៊ុន Young Development Research & Consulting Co., Ltd និង IDRG Company ដែលបានសហការក្នុងការសិក្សាស្រាវជ្រាវ។ ការសិក្សាអង្កេតធ្វើឡើងចាប់ពីកម្រិត១ដល់កម្រិត៤ នៃក្របខណ្ឌគុណវុឌ្ឍិជាតិកម្ពុជា ក្នុងវិស័យអាទិភាពចំនួន៤ លើ១១ មុខរបរ គឺទី១ វិស័យមេកានិករថយន្ត មាន៤មុខរបរ រួមមាន៖ ការថែទាំ និងជួសជុលរថយន្ត ការថែទាំ និងជួសជុលម៉ាស៊ីនត្រជាក់រថយន្ត ការថែទាំ និងជួសជុល ទោចក្រយានយន្ត និងការបញ្ជា ថែទាំ និងជួសជុលម៉ាស៊ីនត្រជាក់រថយន្ត ការថែទាំ និងជួលជុលទោចក្រយានយន្ត និងការបញ្ជា ថែទាំ និងជួសជុលគ្រឿងយន្តកសិកម្ម ធុនស្រាល ទី២ វិស័យសំណង់ មាន២មុខរបរ រួមមាន៖ ការងារកំបោរ និងការដំឡើងបណ្តាញបំពង់ទឹក ទី៣ វិស័យអគ្គិសនី មាន១មុខរបរ រួមមាន៖ ការដំឡើងបណ្តាញអគ្គិសនីក្នុងអគារ និងទី៤ វិស័យកម្មន្តសាលមាន៤មុខរបរ រួមមាន៖ ការផ្សាដោយអគ្គិសនី ការផ្សាឧស្ម័ន ការកែច្នៃបន្លែ និងផ្លែឈើ និងសេវាកម្មថែទាំបរិក្ខារមេកានិក។
អគ្គនាយករងអប់រំបណ្តុះបណ្តាលបច្ចេកទេស និងវិជ្ជាជីវៈ រូបនោះ បានបញ្ជាក់ឲ្យដឹងផងដែរថា គ្រឹះស្ថានដែលត្រូវបានជ្រើសរើសយកមកសិក្សាមានចំនួន ១៧រួមមាន៖ វិទ្យាស្ថានជាតិពហុបច្ចេកទេសកម្ពុជា (មជ្ឈមណ្ឌលឧត្តមភាពកម្មន្តសាល) វិទ្យាស្ថានពហុបច្ចេកទេសព្រះកុសុមៈ (មជ្ឈមណ្ឌល ឧត្តមភាពអគ្គិសនី) សាលាមធ្យមសិក្សាបច្ចេកទេស ហ្ស៊ី េវ៉ សេ វិទ្យាស្ថានពហុបច្ចេកទេសភូមិភាគតេជោសែនបាត់ដំបង វិទ្យាស្ថានបច្ចេកវិទ្យាបាត់ដំបង ( មជ្ឈមណ្ឌលឧត្តមភាពមេកានិករថយន្ត) វិទ្យាស្ថានពហុបច្ចេកទេសភូមិភាគតេជោសែនសៀមរាប វិទ្យាស្ថានពហុបច្ចេកទេសភូមិភាគតេជោសែនកំពត វិទ្យាស្ថានពហុបច្ចេកទេសភូមិភាគតេជោសែនស្វាយរៀង វិទ្យាស្ថានពហុបច្ចេកទេសភូមិភាគតេជោសែនតាកែវ , វិទ្យាស្ថានជាតិពហុបច្ចេកទេសអង្គរ (មជ្ឈមណ្ឌលឧត្តមភាពសំណង់) វិទ្យាសា្ថនពហុបច្ចេកទេស ខេត្តពោធិ៍សាត់ វិទ្យាស្ថានពហុបច្ចេកទេសខេត្តបន្ទាយមានជ័យ វិទ្យាស្ថានពហុបច្ចេកទេសវិជ្ជាជីវៈខេត្តកំពង់ស្ពឺ មជ្ឈមណ្ឌលបណ្តុះបណ្តាលវិជ្ជាជីវៈខេត្តកោះកុង និងមជ្ឈមណ្ឌលបណ្តុះបណ្តាលវិជ្ជាជីវៈខេត្តក្រចេះ។
ឯកឧត្តម ថង សាម៉ុន បានឲ្យដឹងបន្ថែមថា ការសិក្សាស្រាវជ្រាវនេះ បានជ្រើសរើសយកគំរូសំណាកសិស្សបញ្ចប់ការសិក្សាលើមុខរបរ ទាំង១១ សរុបចំនួន ១២៧៥ នាក់ ក្នុងចំណោមសិស្ស ៥ ២០៦នាក់ ដែលបានបញ្ចប់ការសិក្សាឆ្នាំ២០១៦ ដល់ឆ្នាំ២០២០ ក្រុមហ៊ុនសហគ្រាសចំនួន ២២៤ និងគ្រូបច្ចេកទេសចំនួន ៦៣ នាក់ ដោយអនុវត្តតាមបទដ្ឋានស្ថិតិ គឺភាពជឿជាក់ ៩៥ ភាគរយ និងភាពលម្អៀង ៥ ភាគរយ។ ឯកឧត្តមបានបន្តថា៖ មុននឹងក្រុមហ៊ុនចាប់ផ្តើមចុះសិក្សាស្រាវជ្រាវ អង្គភាពសម្របសម្រួលគម្រោង បានប្រជុំជាមួយក្រុមហ៊ុន ព្រមទាំងទទួលបានយោបល់ និងអនុសាសន៍ណែនាំពីតំណាង ADB និង AFD លើផែនការសិក្សាស្រាវជ្រាវ រួមទាំងមានការពិភាក្សាជាបន្តបន្ទាប់លើដំណើរការស្រាវជ្រាវចាប់តាំងពីដំណាក់កាលដំបូង រហូតទទួលបានលទ្ធផល និងបានដាក់ផ្សព្វផ្សាយថ្នាក់ជាតិក្នុងសិក្ខាសាលានាពេលនេះ។
ឯកឧត្តមបណ្ឌិត ពេជ សោភ័ន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ និងជានាយកគម្រោង ដែលបានអញ្ជើញចូលរួមក្នុងពិធីបើកអង្គសិក្ខាសាលាផ្សព្វផ្សាយថ្នាក់ជាតិ នាពេលនោះ បានមានប្រសាសន៍ថ្លែងអំណរគុណដល់ធនាគារ អភិវឌ្ឍន៍អាស៊ី (ADB) និងទីភ្នាក់ងារបារាំងសម្រាប់ការអភិវឌ្ឍន៍(AFD) ដែលតែងតែជួយគាំទ្រលើការងារអភិវឌ្ឍវិស័យ TVET នៅកម្ពុជា។ ទន្ទឹមនឹងនេះ ឯកឧត្តមបណ្ឌិត ក៏សូមអរគុណដល់ក្រុមហ៊ុន Young Development Research & Consulting Co., Ltd និងIDRG Company សហការក្នុងការសិក្សាស្រាវជ្រាវ និងក្រុមការងាររបស់អង្គភាពសម្របសម្រួលគម្រោង ដែលបានរៀបចំសិក្ខាសាលាថ្នាក់ជាតិផ្សព្វផ្សាយលទ្ធផលនៃការអង្កេតវាស់វែងជំនាញបណ្តុះបណ្តាលបច្ចេកទេស និងវិជ្ជាជីវៈ ពីកម្រិត១ ដល់កម្រិត៤ នៃក្របខណ្ឌគុណវុឌ្ឍិជាតិកម្ពុជា នាពេលនេះ។
ឯកឧត្តមបណ្ឌិត ពេជ សោភ័ន បានមានប្រសាសន៍ឲ្យដឹងទៀតថា ៖ រាជរដ្ឋាភិបាលកម្ពុជាបានចាត់ទុកការអប់រំបណ្តុះបណ្តាលបច្ចេកទេស និងវិជ្ជាជីវៈជាកិច្ចការសំខាន់សម្រាប់ពន្លឿនការអភិវឌ្ឍន៍សេដ្ឋកិច្ចប្រទេសជាតិ។ យុទ្ធសាស្ត្រចតុកោណដំណាក់កាលទី៤នៅតែបន្តផ្តល់អាទិភាពខ្ពស់លើការអភិវឌ្ឍន៍ធនធានមនុស្សតាមរយៈការអប់រំបណ្តុះបណ្តាល បច្ចេកទេស និងវិជ្ជាជីវៈ និងការពង្រឹងគុណភាពអប់រំ វិទ្យាសាស្ត្រ និងបច្ចេកវិទ្យា សំដៅឆ្ពោះទៅសម្រេច ទស្សទាន “ យុវជនម្នាក់ ត្រូវមានបំណិនជីវិតមួយយ៉ាងតិច”។ ទន្ទឹមនឹងនេះ ឯកឧត្តមបណ្ឌិត ក៏បានលើកឡើងអំពីសារៈសំខាន់ TVET គឺជាផ្លូវ១ គឺជាឧបករណ៍មួយ ជាមធ្យោបាយមួយ ខ្លីបំផុត និងមានប្រសិទ្ធភាពបំផុត ក្នុងការកាត់បន្ថយភាពក្រីរបស់ប្រជាពលរដ្ឋកម្ពុជាយើង។ ឯកឧត្តមនាយកគម្រោងបានគូសបញ្ជាក់ថា ៖ ផ្លូវមានច្រើនណាស់ដែលអាចកាត់បន្ថយភាពក្រី តែតាមរយៈ TVET គឺជាផ្លូវកាត់រហ័សបំផុតដែលអាចជួយពលរដ្ឋយើងឆ្លងផុតពីភាពក្រីក្របាន។ ដោយឡែក ការរៀបចំការអង្កេតវាស់វែងជំនាញបណ្តុះបណ្តាលបច្ចេកទេស និងវិជ្ជាជីវៈ ពីកម្រិត១ដល់កម្រិត៤ នៃក្របខណ្ឌគុណវុឌ្ឍិជាតិកម្ពុជា លើវិស័យអាទិភាពចំនួន៤៖ កម្មន្តសាល រថយន្ត អគិ្គសនី និងសំណង់ នេះវាពិតជាមានសារៈសំខាន់ណាស់ ដើម្បីឲ្យដឹងច្បាស់ពីស្ថានភាពការងាររួមទាំងផលិតភាព ការងាររបស់សិស្សដែលបានបញ្ចប់ការសិក្សា និងប្រតិសកម្ម ពីនិយោជក ព្រមទាំងតម្រូវការឧស្សាហកម្មផងដែរ ដើម្បីយកមូលដ្ឋានទាំងអស់នេះ ទៅរៀបចំផែនការអភិវឌ្ឍ ការបណ្តុះបណ្តាលកម្មវិធីសិក្សា និងកញ្ចប់បណ្តុះបណ្តាល ឲ្យកាន់តែមានប្រសិទ្ធិភាព និងឆ្លើយតបទៅនឹងតម្រូវការទីផ្សារការងារ៕
Related Post
.png){kind=icon}
.png){kind=icon}
